| 睇歐聯決賽互射十二碼，感覺似睇遊戲節目《一擲千金》，當你以為成功只差一步時候，轉過頭可以一無所有。從來唔相信命，波歷克再次畀人重提生成二奶命，但如果車仔早入局，上半場唔係畀曼聯住砌，結果可能已經係另一回事。 推說宿命難違只係藉口，反省失敗原因先係正確做法，好似連續三年打入美職聯季後賽總決賽都屈居亞軍新英倫革命，今年致力改善球隊問題，前年季初頭五仗作客輸三場，今季卻能交出三勝一和一負佳績，唔止輸波率由六成驟減至兩成，客場入球數更係群雄之冠；向來倚重泰威文數胡革命，今季亦將取分重任分散，文沙尼等中場都有能力後上破關，令敵防不勝防，防守穩健革命今日作客哥倫布機員，絕對有力終止對手連勝走勢！ 希望波歷克同新英倫革命一樣，唔理宿命唔宿命，道理就如《一擲千金》，只要你肯接受挑戰，都有機會成為贏取一百萬巨獎大贏家！ 推介：新英倫革命 | 
