| 歐洲球季最後一個「大賽日」今晚爆發！多個地方都由盃賽決賽做壓軸好戲，羅馬同國米兩大宿敵再度意盃決賽爭霸成為是日焦點，里昂、格拉斯哥流浪亦希望再添獎牌，英超最後一張車飛亦會今日決出，就連女足歐協決賽亦同日舉行，盃賽終極一戰，一觸即發！ 意大利盃決賽今季改為一場過分勝負，羅馬雖有主場之利，但安高始終睇好實力高一線國際米蘭，可以順利贏波捧盃。事實上，缺少托迪羅馬，只係一隻冇牙雌狼，相反人強馬壯、兼夾意甲封王國米，無論士氣同狀態都高過對手，今鋪受讓平半？梗係撐下盤啦！（now633台周日凌晨3:00直播） 咪以為係意國足總偏幫羅馬，畀個主場佢踢決賽，其實呢場波一早已經決定決賽地點，只係咁得咁蹺，羅馬生生性性殺入決賽，最終就可以奧林匹高主場，同國米連續第四年合演意大利盃決賽。 不過，大家唔好以為羅馬有地利就會勝望較高喎！睇番近六次國米作客羅馬，只係輸過一次咁大把，其餘就係國米錄得三勝兩和，問你服未？當然，羅馬想爭個意大利盃當安慰獎，但國米何嘗唔想做雙冠王先？班戰將隨時仲會順便將呢隻盃，當係練文仙尼告別禮物添。
 羅馬托迪繼續養傷
人腳方面，羅馬雖則基本上以夫添出戰，但食胡重心托迪繼續養傷，已經失三、四成功力，相反國米即使有前鋒告魯斯同中堅馬特拉斯停賽，以及中場甘比亞素同守將捷禾受傷，之不過國米人才濟濟，自然有足夠替補，更重要係國米個進攻王牌伊巴謙莫域上仗已經傷愈復出，聯賽煞科戰仲省入兩粒助國米封王，成班波無論士氣定係狀態，都值得信賴。 值得一提係，之前三季決賽，有兩次都係國米捧盃，羅馬淨係上季先威番次，點秤都係國米高多少，今鋪失驚無神國米有得受讓，唔要下盤就真係笨咯！ 意大利盃賽制
決賽以一場過定勝負，在羅馬主場舉行，若法定時間內打成平手，則需以加時決勝負，若仍未分出高低，則以互射十二碼決出冠軍。 | 
