| 英超爭霸戰去到白熱化階段，曼聯前晚砌低韋斯咸帶出三分，車路士今晚作客紐卡素自然一分都不能少。不過，車仔近年去親聖占士公園球場例冇好收場，加上之前惡戰連場，唔易回氣，今場好易出事，安高寧願博「讓球主勝」！（now631台周一晚11:00直播） 雖然話車仔非勝不可兼夾鬥志十足，弊在一眾藍戰士歐聯搏到殘晒，就算佢幾有質素都好，你估真係話贏就贏咩？事實上，近年車仔去親聖占士公園球場就寸步難行，聯賽近五次作客對賽錄得兩和三負，今季英超冠軍獎盃，隨時就呢度交低畀「紅魔鬼」。 車仔 作客聖占士冇料到 人腳方面，車仔除後備門將古迪仙尼因傷缺陣之外，最多都係得波歷克小腿有輕傷，或者會退居後備，基本上都可以擺強陣出戰。之但係咪以為強陣就係勝券在握，睇番佢近五場波，咪只得兩勝三和，唔算突出，當中仲要和過韋根，至於話佢歐聯勇挫利物浦晉級表面精彩，實則咪又係踢到加時先贏，連續三場有失波，都係反映到後防近況有多少不穩。 紐卡素 連續7場未輸過
另邊廂「喜鵲」，過適應期，領隊基瑾終於有貨交，計計埋埋已經連續七場未輸過，狀態唔曳。陣中一對前鋒孖寶奧雲同馬田斯都係有卡士之人，可以威脅到車仔防線。除此之外，今季已經十四張黃牌，再多張，下季開咧就要停三場畢特，基瑾都話明會冒險起用，咁有決心打殘車仔，加埋個主場之利，搶到分唔奇！ | 
