| 波童上次講法國咬唔入巴拉圭，果然踢成○比○，今晚法國將進行歐國盃前最後一場熱身賽，回師巴黎迎戰哥倫比亞，客軍防守力不下於巴拉圭，今場入波唔會多，波童率先推介細盤。考慮到今場係法國出征前「誓師大會」，應可取勝，睇好法國小勝1:0波膽。（廣東體育周三凌晨3時直播）
被編入死亡C組法國，熱身賽秩序搵三支南美兵拍跳，首仗兩球淨勝厄瓜多爾，上場悶和巴拉圭，再就係今晚對手哥倫比亞。過去兩場熱身賽所見，領隊杜明歷用好多副選球員，亦畀一班主力輪流上陣，試陣味濃，至於法國隊今場用乜陣容，波童不妨站杜明歷角度思考，對拆解今場熱身賽會有幫助。 「誓師大會」可小勝 對厄瓜多爾一戰係公布參賽名單前夕，杜明歷派出大批邊緣國腳出戰，施斯同賓艾化踢完呢場都落選。至於對巴拉圭時，韋拉操練時受傷，後防加拿斯缺態，沙洛、杜林亦休息，中前場則夫添出擊，但始終無法攻破巴拉圭大門。
歐國盃前最後檢閱，大戰殺埋身，估計杜明歷將今場視為歐國盃首戰對羅馬尼亞模擬戰，派最強人腳出擊，門將古柏、後杜林、加拿斯都會落場，前線由亨利及列貝利領軍，加上今場安排在巴黎舉行，好有「誓師大會」意味，預計法國可取勝。 哥倫比亞防守OK 哥倫比亞在歐洲集訓，準備世界盃南美洲區外圍賽，早前於中立場以○比一負於愛爾蘭，但整體表現唔差，該隊有多位年輕球員如森柏達、艾斯高巴、拉迪美加西亞及佩尼亞，令球隊活力十足。哥倫比亞在世界盃南美洲區外圍賽四戰兩勝兩和不敗，防守力強僅失一球，更有擊敗勁旅阿根廷戰績，作客法國小敗一球數。 | 
