| 南美自由盃明早上演四強次回合，厄瓜多爾班霸利加大學主場迎戰墨西哥勁旅CF阿美利加。首回合兩隊打成一比一，表面上未分高下，但實力高一班CF阿美利加，上場僅屬試探對手，憑佢絕佳攻力，足以次回合反客為主，受讓有捧場價值，敲「讓球客勝」好穩陣。（有線足球台61周三早上9時10分直播）
墨西哥聯賽常規賽早已收咧，CF阿美利加可專心備戰南美自由盃，上任僅一個月CF阿美利加看守練濃拿，帶領球隊先後淘汰兩支巴西勁旅法林明高同山度士，領軍能力有目共睹，球員都力撐佢坐正，如果佢能夠帶領球隊打入決賽，相信球會一定定份合約出等佢簽。
雖然傳統以來，CF阿美利加屬於主場球隊，但濃拿上任以來，完全將呢個特性推翻，依家球隊穩守突擊踢法，非常適合踢盃賽同作客賽事，十六強作客馬拉簡拿球場，大勝法林明高三比○已證明呢一點，前線巴拉圭國腳卡賓拿斯狀態大勇，今屆自由盃已射入八球，大有機會莊成為兩屆神射手，CF阿美利加攻守兼備，受讓非常有利。 利加大學唔夠專注 利加大學雖然擁有高原地利，但墨西哥同樣來自高原，故適應上問題唔大，而且CF阿美利加唔使踢聯賽，可提早到厄瓜多爾備戰，反而較兩線作戰利加大學有利，利加大學晉級過程之中，未遇過真正強隊，近三場自由盃都係打和，咁成績又點讓波呀？ | 
