| ○八歐國盃首個高潮，今場死亡C組出現。焦點大戰，被譽為天才雲集、能夠踢出最漂亮足球荷蘭，將會火併以戰術紀律聞名○六世界盃冠軍意大利。兩大足球強國對壘，究竟誰勝誰負，肯定要經過一番惡鬥先知結果，兩軍陣容星光熠熠，雲達華治、雲達沙、派路及保方等星級戰將均會披甲大廝殺，想睇星？今日千祈咪走雞！（now632台、廣東體育及中央5台周二凌晨2:45直播）
良好紀律，同純熟默契，加上世界盃王者自信心，就係意大利今屆爭標強力武器。當然，佢首先仍要解決傷兵困擾問題，先有力死亡C組脫穎而出。
相比○六年世盃封王，意大利大軍骨幹變動其實都未算太大，成員間默契同信心自然有利佢惡劣環境中爭勝。前線仍然有射手東尼做重心，中場雖有「羅馬王子」托迪告別國家隊，但由佢接班人迪羅斯拍住AC米蘭中場孖寶派路同加度素控制節奏，一樣係攻守兼備，歐洲最頂級。 彭路基加入十字軍 不過，藍衫軍面對最大難題都係來自防線，隊長簡拿華路因傷退隊，加上正選右閘彭路基練習中受傷。相信後防線演出，將會成為佢今仗得失成敗關鍵。 結論：壞消息多不利藍衫軍 荷蘭以攻為守，意大利以守為攻，兩軍戰術上比併將會左右勝負。可惜，意軍賽前壞消息連連，對備戰工夫同專注力影響唔少，加上後防變動，隨時會令防守出錯，特別係荷蘭射手雲尼斯達萊絕對唔係鹵莽馬特拉斯或者經驗不足巴沙利可以應付，意軍今場讓波，認真危危乎。 鄧納東尼點兵夠果斷 文： 江忠德 羊城近期天氣變幻莫測，忽冷忽熱，加上捱夜講波，好容易中招傷風感冒，惟有盡量爭取休息增強抵抗力，之不過，球員突然受傷就點防都避唔到，意大利景況好過荷蘭，贏面當然高些少。
「超級死亡C組」，意大利對其他三隊往績佔晒上風。領隊鄧納東尼保留番兩年前世界盃後防骨幹打好基礎，中場加入防守型同創意型球員，最重要係放棄狀態一般世界盃前鋒功臣恩沙基，取而代之用呢季意甲入波最多意籍球員迪比亞路，一切準備就緒，以佢地打硬仗爆發力，可望響頭炮。
荷蘭外圍賽最閉翳就係唔識入波，賴恩巴布受傷離隊，洛賓又掛彩，得「雲佬」可以寄予厚望。後防線偏弱，施多夫又毅然退出，再次暴露出荷蘭每逢大賽就會內訌「傳統」，內憂外患令到荷蘭面對意大利難攖其鋒。
反而頭場羅馬尼亞有殺出重圍能力，佢已經外圍賽展示力量壓倒荷蘭，呢支東歐技術型球隊強調團隊精神同紀律，雖然大多數球員波糧唔高，依然支持羅馬尼亞足協拒絕商家重賞，更加凸顯球員為國爭光頑強鬥心！首輪對住一向都有慢熱毛病法國，羅馬尼亞有機可乘。
法國強處在於中場，但係列貝利第一次大賽擔正大旗，能唔能夠好有效咁支撐中場大局帶動球隊呢？亨利、馬隆達、安歷卡狀態都不復當年勇，慢熱會令到法國好難首戰全取三分。 用史華高斯代真高拿
布克拿調兵顯功架 文： Mandy 見到我Mandy，唔使問阿貴都知我贏阿Joe，成為《太陽波經》歐國盃Babe啦！緊Mandy會度同大家傾偈講波經，各位讀者真係要多多指！今日係歐國盃Day3賽事，作為一個標準球迷，點都要約埋班friend出睇波感受歐國盃氣氛。 藍衫軍冇大簡濕滯 東道主之一瑞士出師不利，揭幕戰大好形勢下輸畀捷克，入波功臣史華高斯賽後開心到喊，搞到Mandy鬼死咁感動。Mandy最欣賞係領隊布克拿，咁夠薑用史華高斯入替中鋒真高拿，佢老人家調兵遣將功力真係唔睇得小。
尋日同班觀音兵傾開波經，佢話今晚「死亡C組」戲碼最勁，尤其是尾場荷蘭對意大利。Mandy認為意大利冇簡拿華路都幾濕滯，加上Mandy不嬲思想開放，梗係支持荷蘭呢類崇尚進攻球隊啦，受讓平半唔撐「下盤」點得？ | 
