| 英冠附加賽次回合，侯城主場鬥屈福特，侯城小讓平半可續追。屈福特沉三個月，期間十五仗僅勝一場，作客仲吞過侯城三蛋，已成強弩之末。侯城雖然打和就晉級，但佢幾個前鋒晒火，領隊菲爾布朗又信心爆棚，點會唔同你攻，上盤好路之餘，大盤都要吼實。（now 898周四凌晨２時45分直播） 首回合侯城作客屈福特，雙方踢得好放，彼此都有大把入球機會，但侯城前面攻得之餘，仲有個出色龍門邁希爾頂住，所以贏二比○係合理戰果。侯城季尾生龍活虎，老將班比復出壓到場，前鋒「老來嬌」韋達斯同曼聯借將費沙甘保擦出火花，再加上秘密武器卡雷布科蘭，侯城絕對係附加賽四隊中，攻力最強一隊。侯城主場威力勁，成績全個英冠排第二，比冠軍西布朗同亞軍史篤城仲勁；近六主場得勝率超過八成，當中仲包括怒炒今場對手屈福特三粒，呢次手兩球優勢，球員及領隊信心十足，主Ｗ可添食。 屈福特季尾冇料到
屈福特本季虎頭蛇尾，近月表現跌晒Watt，聯賽最尾一場唔係逼和黑池，得失球差僅壓過狼隊，早就跌出前六之外。雖然佢係本季作客成績最好球隊，但狀態差係不爭事實，再加上隊長烏斯泰斯上仗領紅今晚缺陣，後防大將薛圖亦因傷上陣成疑，呢次作客更兇險。 侯城擺明恰死屈福特，以菲爾布朗狂妄性格，以及一班勒都勒唔住攻擊球員，今晚一樣會全力入波爭勝；而客軍主帥保夫萊特明言，會一開波就搶攻，務求早早入波扭轉劣勢。預計戰情同首回合一樣，唔慌冇波入，捧上盤之餘，要吼埋大盤。 | 
