| 今晚德乙緬恩斯主場鬥凱沙羅頓，係當地萊恩蘭普法爾茨州打戰，面子攸關打甩髀，緬恩斯箭頭保查腳風大順，要全取三分唔難，1.65倍主W唔好嫌熱！（開賽時間：周六凌晨0:00） 本來打戰經已氣氛緊張，但兩隊近況無疑令今仗火上加油，事關緬恩斯目前只係以一分之微壓過科隆排德乙第三，由於仲有四輪比賽，所以緬恩斯升班資格一都唔穩陣。偏偏凱沙羅頓亦為護級頭痕，戰意一樣有，但論實力，又邊係緬恩斯皮？ 除實力，我撐緬恩斯另外一個原因，係佢射手保查近兩仗射入四球，狀態大勇，佢拍檔巴查克近三仗亦有兩球進帳，一隊箭頭晒火，已經有本錢贏波，加上緬恩斯今季主場對聯賽包尾六隊（未計凱沙羅頓）有四勝一和，實力明顯高一班，要贏凱沙羅頓根本冇難度！ 紐倫堡主帥唔識變通
上季德國盃盟主紐倫堡暫時以二十七分排第十六位，護級形勢惡劣。其實呢班波本身人腳唔錯，衰在有個無能練尹希臣，上場主場大好形勢領先比勒費爾德兩球，到最後都竟然畀人逼和，前鋒維迪同真高拿全場踢到無晒影，賽後被kicker網站分別狠評得4.5同3.5分（分數愈低表現愈好），但尹希臣死都唔換佢出場，最後全場一個人都冇換過，可見佢根本完全唔識變通，加上中場發電機米斯莫域仍未傷愈，睇怕紐倫堡呢三分都係凍過水！ | 
