| 多蒙特執到“堡” 多蒙特在德國盃決賽飲恨在拜仁腳下，想話捧番隻盃“威吓”都唔得，唯有痛定思痛，專心一致搶夠分數，保住甲組席位，今晚對住處於降班位置的紐倫堡，確係一場唔係你死，就係我亡嘅比賽，所以今仗必定全力出擊，誓將對手置於死地。 正處於水深火熱的紐倫堡，今仗未能搶到分數的話，球隊將危在旦夕，餘下三場比賽都要搏到盡，今晚一戰亦係最關鍵一仗，贏波仲可以加強士氣，繼續掙扎求存，一旦輸波就要望天打掛，如此巨大壓力，想發揮出更佳水準都難，今晚絕對唔睇好，要讓波的多蒙特可以捧場。 多蒙特目前多紐倫堡八分，降班威脅其實唔算太大，但始終一日未上岸都未放心得落，所以今仗三分志在必得，德國盃火倂拜仁踢足一百二十分鍾，證明球隊仍有一定實力，天加、華迪斯、基姆域斯等所組成的攻擊線甚具殺傷力，面對紐倫堡脆弱防線，應該夠殺有餘。紐倫堡近兩場一勝一和搶得寶貴四分，狀態似乎唔錯，只是球隊作客戰績奇差，加上護級壓力極大，今晚都係凶多吉少。 推介：多蒙特 3:1 | 
