| 歐洲好多聯賽都已經步入最後階段，現階段可謂北歐波做主打。今晚挪超有六場賽事，關爺率先揀選費德列斯達畀大家。呢班波開季走勢都唔錯，賽前排於聯賽榜第二位，今次主場對排第十一位阿里辛特，三分應該可以手到拿來；另外兩關就推介利恩大盤及瑞典盃艾夫斯堡勝。（周六凌晨零時開波） 費德列斯達對阿里辛特呢場波，捧費德列斯達其中一個原因係佢主場表現出色，今季三次主場出賽悉數贏波，仲平均取得兩個入球；另一方面，費德列斯達近期走勢其實都唔錯，剛挪威盃以六比一大勝級數稍差邁森。費德列斯達無論賽績及近況都有支持，相信再贏一場機會非常高。 利恩史達比克做大騷 相反對手阿里辛特今季三場作客賽事全部輸波而回，上一輪聯賽仲慘吞利恩四隻光蛋，阿里辛特近期表現都好曳，今次作客遇強敵一定要反佢。 另外利恩主場對史達比克係本輪挪超重頭戲之一，兩隊實力不相伯仲，關爺唔敢講邊隊會有優勢，但相信今場入球一定唔會少。事關連同熱身賽及聯賽，史達比克近三次作客利恩都開出大盤，關爺預期今次對賽會同之前一樣，兩軍皆會鬥攻，入球偏高好正常。 最後一場係瑞典盃第三圈賽事，由艾夫斯堡對奧雷布洛，艾夫斯堡係瑞典超強隊之一，陣中已有門將祖漢韋蘭特及安達斯史雲遜入選瑞典國家隊，奧雷布洛只係聯賽榜中下游分子，點秤都應該唔夠抽啦！ | 
