| 歐協盃四強首回合大戰爆發，拜仁慕尼黑今晚主場迎戰辛尼特，隨時失威打唔響頭炮，事關拜仁有「戰神」東尼停賽，冇佢，前線火力可能得番七成，再加上四日前佢德國盃封王，高層即刻安排慶功宴，球員飲飽食醉未必撻得，冷敲辛尼特「讓球客勝」好過。（有線62及64、廣東體育周五凌晨2:45直播） 四日前德國盃決賽，拜仁踢到加時至險勝多蒙特二比一捧盃，連累周街捧場客損手爛腳，呢鋪決定唔再捧佢，最大原因，就係連續三場梅開二度意大利射手東尼，因為累積黃牌被迫停賽，佢缺陣分分鐘帶來災難，特別係高路斯、普多斯基狀態唔夠，默契又差，拍檔搵食未必有好結果。 除此之外，拜仁高層竟然德國盃決賽當晚，安排球員到酒店慶功，仲批准佢帶埋老婆、女朋友出席，結果慶功宴幾乎變成選美會，球員不斷擺甫士同老婆、女友合照，似乎已經唔記得，緊接仲有辛尼特、史特加兩隊硬等緊佢，何況拜仁近七場盃賽主場得三勝三和一負，得勝率低好易又領。 「戰神」東尼 坐波監
辛尼特係上季俄羅斯聯賽冠軍，頭係前荷蘭國家隊領隊艾禾卡特，雖然佢有右翼安約高夫因傷避戰，不過射手普格恩耶克相當弗，今季佢歐協盃攻入八球，入球數字僅次東尼九球，既然辛尼特晉級過程中淘汰過利華古遜、馬賽同維拉利爾，證明實力唔差，碰拜仁斷箭火力大減，客軍首回合偷到雞唔奇！ | 
