| 繼上個月捧走聯賽盃之後，格拉斯哥流浪正向住蘇超、蘇總同歐協盃三大錦標進發，話唔埋會成為「四冠王」！之不過咁，今晚歐協盃四強首回合對意甲費倫天拿，流浪有成八位主力唔出得，陣容殘到咁就算有地利兼唔使讓波都信唔過，平手盤撐「紫百合」坐走望贏！（有線61周五凌晨2:45直播） 費倫九成不敗
單單過去兩星期就踢四場波，流浪絕對係忙到甩轆，周日對聖莊士東蘇總四強，流浪踢足百二分鐘兼射埋十二碼先晉級，你話班球員唔就假。最弊係基斯布基同賴史密夫呢場波受傷，今仗又有隊長巴利費格遜同奇雲湯臣停賽，麥基哥、查理阿當、麥高洛治及比士利仲養緊傷，大拿拿超過半隊主將缺陣，今晚想先下一城？真係冇乜本錢！ 雖然費倫都有烏化奴斯倦勤同當拿度停賽，但傷愈高特立同蒙杜利禾都可以頂替二人位置，問題唔大。再講，「紫百合」今季歐協盃只係輸過一場，不敗率超過九成，對住天殘地缺流浪有力客勝而回！ | 
