| 數數手指，原來馬德里體育會已經成十一年冇玩過歐聯，今季會方大灑金錢堆砌星級陣容，球隊終於踢番應有水準。撞正今仗對手愛斯賓奴正值低潮，正正係馬體會搶分鞏固歐聯參賽席位好時機，作客讓平半一於撐「上盤」！（有線61周五凌晨3:00直播） 西甲聯賽冠軍雖然塵埃落定，但馬體會仲有機會重返歐聯大舞台，試問一眾戰將又點敢掉以輕心？馬體會出名火力強勁，阿古路近三仗轟入三球，小將甘馬曹上仗更加梅開二度，配合埋科蘭同麥斯洛迪古斯等進攻好手，即使雷恩斯同沙保沙倦勤，鋒力依然有保證。 愛斯賓奴踢風流波
主隊愛斯賓奴近七場聯賽未贏過，依家積分榜高不成、低不就，簡單講今仗等同風流波，戰意肯定唔及馬體會。再講，「賓佬」發電機迪拉彭拿同隊長達蒙度倦勤，鋒力嚴重受損，加上門將卡文尼、守將拿告魯斯同摩西斯養緊傷，托利莊停賽，連防線實力都大打折扣，就算有地利都難寄厚望！ | 
