| 日職打接近三分一，浦和紅鑽季初脫腳後，好快重回正軌殺上榜首。不過，紅鑽攻守重心田中莉王上場勇戰右肩受傷，聽日未必踢得，球隊演出隨時走樣。川崎前鋒連續四仗反勝對手，展現球隊超強後勁，今次對住紅鑽未驚過，有力連下五城！（周六下午1時開賽） 川崎前鋒近況全面回勇，中前場球員入波停不了，上季日職神射手祖尼奴上場梅開二度，中場新星谷口博之近四仗入三球，加埋北韓王牌箭頭鄭大世，進攻點夠晒多，對手唔易防範。前鋒近四場轟入十二球，火力非常強勁，而且場場都係落後情況下反勝對手，堪稱日職後勁王，今場齊晒腳出戰聯賽，將全力終止紅鑽強勢。 紅鑽或缺田中莉王
紅鑽連續九場聯賽不敗殺上榜首，全靠頭安格斯變陣成功，將中堅田中莉王推上中場，充分發揮呢位「得分後」最強威力，佢目前於聯賽攻入六球，屬隊中首席射手，可惜佢上場整傷膊頭，今午上陣成疑；而射手艾美臣同高原直泰都靠唔住，今仗對手來勢洶洶，未必頂得住。 天鵝主場穩勝山葉
同日直播賽事，新潟天鵝主場迎戰磐田山葉，兩軍靠晒巴西前鋒食胡。山葉箭頭基仙奴今場因傷缺陣；反觀天鵝射手阿歷辛度紐尼斯愈戰愈勇，上仗梅開二度協助球隊贏波，主場出擊有望再下一城！（now 633周六晚6時直播） | 
