| 今晚英超獨腳戲，車路士主場對韋根。車仔如想保持爭標機會，於月尾硬撼曼聯前唔可以再失分，幸好今晚對手韋根遇強隊例腳軟，自三年前升班以來，對住車仔六戰全敗，車仔今晚主W可謂十拿九穩，以佢近期主攻踢法，1.6倍半場勝亦值得捧場。（now 898周二凌晨3時直播） 未計尋晚曼聯對阿仙奴場波，車路士暫落後曼聯三分，餘下五場賽事非常關鍵，相對之下，今仗對韋根係最容易應付一場，故車路士可謂志在必得。雖然車仔近期要分心應付歐聯，但球隊人強馬壯，即使領隊格蘭今仗採用輪換制度，畀部分主力休息，仍有足夠實力擊敗韋根。 開波即搶頻開半場勝
韋根自○五年升班後，對住英超Big4，一度保持連敗二十場不光彩紀錄，直至年初逼和利物浦，先打破呢個魔咒。不過對賽往績上，韋根升班後六次對車仔全敗，加上車路士聯賽主場已經七十九場不敗，有個咁惡主場，即使韋根要搶分護級，都留番下場好過。 事實上，韋根聯賽作客成績差勁，今季僅贏過一場，所贏對手仲要係魚腩打比郡，而落敗率亦高達七成，可見佢作客非常輸得，如認為主W1.17倍冇肉食，可博1.6倍半場勝，因為車仔近期戰術都係一開波即搶攻，近八場有七場開半場勝，開出頻率頗高。 留力周四鬥愛華頓
另一點值得留意係車路士踢完呢場波，將於周四晚作客愛華頓，呢場波原本安排周末舉行，但因為電視轉播問題改當地時間周四舉行。愛華頓今季成績咁好，車仔始終有避忌，所以呢場一定想盡快解決對手，留番力踢下仗，令今仗開出半場勝機會更高。 | 
