| 日聯盃第三輪分組賽今日開波，浦和紅鑽主場迎戰京都不死鳥，上場紅鑽擊敗鹿島鹿角踢出今季代表作，射手永井雄一郎梅開二度搶晒鏡，挾四連勝氣勢，對住升班馬不死鳥超晒班，今場1.44倍主W穩如泰山！（周三下午6時開賽） 新帥有料到
紅鑽開咧首三場輸晒，仲要一球都入唔到，跌到一地眼鏡碎。不過，佢改由安格斯掌帥後，成績立即回升，近四場聯賽贏晒，上場更成功終止爭標勁敵鹿角跨季聯賽十四連勝成績，呢場勝利標誌呢隊「日職紅魔鬼」正式翻生，士氣大幅提升，重新撻後，預計仲會有排贏。 紅鑽今季引入名牌射手高原直泰，但佢狀態低沉，上仗上半場已經畀人換走，賽後佢坦言對自己表現好失望。呢邊廂高原咁愁，但隊友永井雄一郎就開心到暈，上場佢後備入替梅開二度盡顯身價，今仗極有機會取代高原踢正選，拍住上輪日聯盃對不死鳥連中三元艾美臣，唔使驚紅鑽入唔到波。 不死鳥見底
不死鳥升班後演出脫胎換骨，季初頻頻贏盤，但佢實力基本上見晒底，上輪盃賽能夠三比三逼和紅鑽只因對手未谷起，今次作客難再爆冷。 另外，今場不死鳥巴西中場阿達利巴要停賽，組織力大打折扣，面對來勢洶洶紅鑽好難頂得住，主勝夠穩，估計紅鑽可以贏兩球或以上，捧埋「讓球主勝」！ | 
