| 自從馬會開埋日乙之後，「日本通」蘇豪終日埋頭苦幹，四周圍搵好料畀讀者，樂比仔決定搶番蘇超地盤，等佢專心推介日本波，首次出手就係格拉斯哥重量級打戰，些路迪主場對格拉斯哥流浪，淨係睇個績，近四次交手都贏波流浪，今仗有受讓平半之利，表面上好吸引，但樂比仔認為些路迪決心夠，今仗可贏番鋪。（now 825周四凌晨2時45分直播） 格拉斯哥流浪今季表面好風光，聯賽盃已袋落袋，足總盃同足協盃入四強，聯賽又排榜首領先，大有機會史無前例食出大四喜，不過樂比仔認為，戰線太多只會害流浪，因為佢根本冇足夠兵力及板深度應付咁多大戰。 事實上，現時流浪領先些路迪四分，但踢少兩場，剩番兩場賽事分別係對馬瑟韋爾及聖美倫，雖然今個周末已展開爭標組同護級組賽事，但呢兩場波仲未排到期踢，可見流浪近期幾咁忙，由於流浪仲大把分手，即使今仗輸波，對爭標形勢影響亦唔算真係好大，上仗聯賽作客登地聯，外國盤口由讓半一退熱到讓平半，結果流浪和波輸盤，已可見流浪對聯賽漫不經心態度。 流浪分心兩盃賽
相比之下，流浪未來兩仗分別係足總盃同足協盃四強賽事，呢兩場對佢講更重要，故決心上肯定唔及孤注一擲些路迪，些路迪雖然月初被馬瑟韋爾打破聯賽主場不敗紀錄，但上仗已經報仇成功，作客贏四比一，可見球隊吸收過訓後，唔會再重蹈覆轍，些路迪今季兩次輸畀流浪都係作客，呢次主場出擊，讓平半有機會贏番鋪。 | 
