| 兵工廠須痛定思痛 今季英超已近尾聲，相信最失落的是阿仙奴。打完上半季，阿仙奴有機問鼎三冠王。可惜近期連場大戰，變成四大皆空，只能得番個來屆歐冠盃外圍賽安慰奬。阿仙奴班小將唔係打得唔好，為何成績會這麼差？好明顯攻力肯定有，但似乎比較集中在艾迪拜約一人身上。到目前止，艾迪拜約已入了二十球，佔球隊總入球數近三分一。至於其他球員，則以中場的費比加斯排第二位，入了七球。呢個都唔係大問題，反觀後防，在卅四場英超聯賽失了廿九球，唔單只多過其他三強，連排第五的愛華頓也不如。 有攻力防守欠穩，可說是阿仙奴今季難以再上一層樓的原因。當年摩連奴入主藍戰士，首先重整一條後防線。此後連續三屆，車路士的後防可謂固若金湯，任何一隊強隊，無論鋒力幾強，都極難入到佢一球，亦令車路士成為失球最少的球隊。在這三屆中，車路士兩奪聯賽錦標。可以看到，阿仙奴下季要有一番作為，應要重新組織一條穩固的後防線。 還有一個原因，正如費爵爺所言，曼聯今季能夠有此佳績，最重要係狀態穩定。尤其在與強敵交手中，佔盡優勢。今季曼聯、阿仙奴、車路士和利物浦在英超碰頭，除了尚有一場紅魔作客藍戰士未打，在對賽中，曼聯取得十三分，錄得四勝一和。第二位的是阿仙奴只得六分，車仔暫時得五分，最差係利物浦，畀曼聯雙殺，與阿仙奴和車仔兩和，僅得四分。阿仙奴下季要保持狀態，不要像今季般虎頭蛇尾，就要考慮增加具實力的後備。因為，今季自華確特及艾杜亞度受傷後，好明顯影響球隊成績。 | 
