| 今晚西班牙盃決賽由華倫西亞惡鬥基達菲，比賽將於馬德里體育會主場卡特朗球場上演，雙方今季未有錦標到手，故今仗對兩軍講異常重要。（周四凌晨４時開賽） 「蝙蝠兵團」下半季全副心機放晒落西班牙盃，稍有閃失隨時星散；而基達菲亦已失落歐洲足協盃，加上球隊上屆西班牙盃決賽飲恨，捧盃渴求難以用筆墨形容！既然大家都志在必得，嘉輝認為雙方肯定唔敢輕舉妄動，決定推介有２倍分頭半場和。 兩隊怕輸鬥小心
今屆西班牙盃突然受到重視，尤其係巨型班華倫西亞，若然捧唔到盃話，唔單只練朗奴高文炒硬，亦必定會爆發星散潮！難怪華倫近期連護級都放埋一邊，一心捧西班牙盃先算。至於基達菲方面，上年痛宰巴塞殺入決賽，贏盡口碑但贏唔到獎盃，今屆捲土重來再入決賽， 吸取失敗經驗後唔易對付；所以嘉輝估計兩軍「唔想輸」心態下比賽，上半場悶戰居多。 再以踢法計，基達菲肯定會沿用最拿手穩守突擊，加上今場屬於一場過，預計佢會更為保守。而華倫方面，中前場球員狀態僅一般，近三場賽事僅入一球，面對嚴陣以待基達菲防線，要入波唔易，所以半場和係最佳選擇。當然，入球細亦可一試。 | 
