| 西甲雙雄“和”平大戰 首先恭喜皇馬第三十一次奪得西甲聯賽冠軍，恭喜、恭喜。二比一反勝奧沙辛拿之後，皇馬已經提前三輪比賽成功衛冕西甲錦標，今晚主場迎戰巴塞，雖然勝負對皇馬封王影響不大，但始終兩隊在西甲屬於“大哥級”，而且一向都係“敵對派”，一碰頭更加唔衰得，剩為啖“氣”都打到頭崩額裂，皇馬要在自己“粉絲”面前打敗死敵，贏波捧盃更具意義，至於巴塞除了唔衰得之外，更希望搶回次席位置，呢場雖非榜首之戰，但相信一樣會鬥得精彩激烈，殺得難分難解。 半場打少一人兼落後一球，皇馬能夠反勝奧沙辛拿其實並非僥倖，全憑球員充滿鬥志及打不死的拼搏精神，整場表現與發揮的確值得一讚，如果今晚繼續踢出當日的鬥心及水準，再將死敵巴塞擊敗的話，貝拿堡球場就更加熱血沸騰，希望唔好被勝利沖昏頭腦，慘敗畀巴塞就冇晒癮。巴塞周日大勝華倫西亞六球，將四大皆空的“冤氣”盡情發洩對手身上，球隊已經冇任何顧慮，只係能否搶回第二位置，唔需要打歐冠外圍賽，一於放盡去踢，同皇馬打一場燦爛之戰。 推介：和波二比二 | 
