| 曼聯抗“咸”潮 由於在得失球方面佔有極大優勢，曼聯只要在餘下兩場比賽贏波，就可以成功衛冕聯賽錦標，第一關就係今晚主場對韋斯咸，唔使講，一班“魔星”的必勝決心一定大過天，對手只係踢“風流波”的韋斯咸，所以如無意外，曼聯呢三分應該冇走雞，之不過初盤要讓到兩球，似乎過份些少，要數到三球先有錢收，不如博下盤韋斯咸，一來近三次碰頭韋斯咸都食住曼聯，二來即使今晚係一場無關痛養比賽，就算唔阻你發達，但點都唔會畀你大炒咁羞家，頂多輸一球起兩球止。 曼聯憑住老將史高斯的入球，成功打入歐冠盃決賽，有機會成為雙冠王，球員自然特別醒神兼爭標決心極大，至於今晚一戰，其實費爵爺只求三分，贏多少根本唔係問題，所以踢法上可能會積極之中帶點保守，注重防守多於進攻，亦係費爵爺近期作風，即使球隊贏波在先亦會以穩守為主，所以曼聯近期比賽入波唔多，相信今晚難以大勝對手。韋斯咸近三次都能夠擊敗曼聯，古比士利似乎對曼聯打法料如指掌，雖然勝負對球隊意義不大，但相信亦唔會放軟手腳。 推介：曼聯 2:1 | 
