| 葡國食住土耳其 歐洲國家盃今晚開鑼，率先上演兩場A組賽事，主隊之一的瑞士首仗對捷克，至於澳門球迷熱捧的葡萄牙就迎戰土耳其，A組四隊波的實力真係好接近，冇話邊隊有十足的把握贏波。熱門之一的葡萄牙初盤硬讓土耳其半球，屬於可勝不穩格局，因為葡萄牙有入波本錢，但防線就唔係咁穩陣，但若然投注，都係追葡國啦。 沒有費高、雷哥斯達和保利達，葡萄牙陣中就有實力更強的C朗拿度、迪高和森馬奧頂住，今季以四十二個入球協助曼聯贏得英超和歐冠盃雙料冠軍的C朗拿度，人氣、狀態都好高，但肯定是今屆賽事中列強後衛的眼中釘，想帶波、想過人、想入波，真係唔係話咁易。可以想像，C朗肯定會成為衆矢之的被睇死，直接影響葡萄牙的攻力，所以迪高、森馬奧、蘭尼和基利斯馬一班後上殺手就變得好重要，當然，仲有今屆響德甲表現極佳的曉高艾美達，基本上，若然土耳其只顧睇實C朗反而更危險。 從前中後三線計起，土耳其的實力真係唔差得過邊一隊，尼赫特、比路素古、辛尼、夏美艾天托和施天都係實際型球員，中場攔截向來硬淨，惟獨防守較弱稍欠信心，此外，近年兩次交手，甚至追溯至五幾或六幾年，葡萄牙都係有贏冇輸，格食格，都係捧葡國好。 推介：葡萄牙勝2:1 | 
